صورتك في عيونك وكيف صارت في عيون الآخرين ؟

بقلمي جمال القاضي

(  بدون فصحى )

مفيش شك أن كل واحد فينا جواه تصور واضح عن نفسه، راسم كمان في خياله صوره مجسمه لها، طبعا الصوره عن نفسك اكيد صوره مثالية جدا في الأخلاق وفي الثواب حتى لو كان صاحب الصورة شخص حرامي او مرتشي او مدمن مخدرات او بلطجي او باي شكل كان وكان سيء، لكن في نفسه الصوره المعكوسه عن  شخصيته جميله حتى لو عارف عنها أي سوء فكل سوء هي كانت عليه عنده ولها مبرر وال مع التبرير بيقنع نفسه انها كويسه 

شيء طبيعي بيكون عليه كل البشر الا من رأى نفسه على خطأ وراح يقوم من نفسه لتصبح الصوره أوضح ومكتملة  الجمال

طيب ليه بيحصل انك بتزعل من الناس ال حواليك في بعض الأحيان بس نتيجة لنقدهم لعيب عليه شخصيتك

اقولك

مش شرط خالص ان يكون فيه تشابه تماما مابين رسمك وتصورك عن نفسك لرسم غيرك وتصورهم عنك لان الاتفاق المطلق فيه شيء من الكذب على الواقع، اما الاتفاق النسبي فهو حاله صحية جدا والسبب ان حضرتك وانا وكل الناس  بعد رسم الصورة المثاليه عن نفسنا مش بكفينا الرسم ده، الكل عايزين نفس الرأي ال  اخدناه عن نفسنا يكون مطابق تماما لرأي الغير فيه دون أي خلاف مابين رأيك ورأي غيرك، لكن ولأن فيه كاميرات آخرى تلتقط صور عننا وبيتم ترجمتها وإرسال تقرير مفصل عن الصورة فبيطلع عدة تقارير مختلفة التشخيص وكل واحد بشخص  الصورة المجملة عنك وعن سلوكياتك نتيجة اختلاف المعايير ال بتدخل أثناء كتابة التقرير، زي ايه زي تركيبة الشخص ال حضرتك بتقابله كل يوم او بالصدفة، زي كمان الحاله المزاجية للشخص ال بقابلك، زي كمان تأثير اصدقاؤه عليه وحكمهم عليك لو اتكلم عنك أمامهم، زي كمان المواقف نفسها امته وفين 

فلو مثلا انا شخص سيء وصدفة قابلني شخص وجمعنا مكان لقاء صدفة أثناء مصلحة مشتركة، وفجأة وهو جنبي شاف وجهي مبتسم لاني افتكرت نكته مثلا، ومع الابتسامه كنت بتكلم معاه بأسلوب راقي ولأول مرة رغم اني كنت على طول الحياه سيء التعامل وعديم الذوق والاخلاق، حكم الشخص هنا انا في نظرة شخصية راقية وذوق ومحترم، والعكس تماما لو كنت دايما شخص محترم لكن لظرف ما قابلت نفس الشخص وكنت نظرا لموقف حصل معايا بالمنزل كنت متعصب مع أي شخص ومنهم نفس الشخص ده وال كان بالمكان بالصدفة، اكيد الحكم على الشخصية والرسم المطبوع عنها هيكون شخصية سيئة 

اما ال بزعج بعض الاشخاص هو نظرية الغير المخالفة للصورة الرائعة لأشخاص رائعين فعلا نتيجة موقف بسيط لايستحق اختلاف الرؤية والرسم المنقول بتخطيط مشوه، لكن زي ماذكرت مش بالضرورة ان كل الناس تجتمع على رأي واحد في السوء او الحسن، لأنك هتشوف ال انت شايفه سيء فعلا في نظر غيرك غير كده لانه مثلا أتى بفعل كان نفسه يفعله ولما أتى بالفعل كان إعجابه وانبهاره بشخصيته، اما عن الاختلاف في المشاعر وكمان رؤية أصحاب الخلق والمحاسن الطيبه على انهم أشخاص غير كده فده تبريره ممكن يكون غيره او حقد داخلي لانه قدر يعمل شيء معرفش هو نفسه يعمله وكان نفسه يعمله برضه 

اختلاف وجهات النظر شيء طبيعي، وكاميرا العيون هي مرآة كل واحد فينا بيشوف صورته الحقيقية فيها بس بشرط تكون من كاميرات كتير توثق التشابه وحضرتك المسؤل عن كتابة التقرير عن شخصيتك فلو حبيت يطلع تقريرك وصورتك بصورة أجمل فلازم تحسن من افعالك ومتزعلش لو فيه اختلاف على شخصيتك لكن لازم تزعل من نفسك لو لاقيت الرأي الاكتر انك شخص مكره ومش محبوب .